26 di settembri: Jurnata Europea di li Lingui.

di FONSO GENCHI

Lu 26 di settembri di ogni annu si cèlebra la Jurnata Europea di li Lingui. La prima si celebrau nta l’annu 2001. Instituita di lu Cunsigghiu d’Europa e cu lu patrociniu di la Unioni Europea, havi sti fini:

  1. Informari li genti d’Europa supra l’impurtanza di insignàrisi li lingui pi agumentari lu plurilinguìsimu e pi capiri megghiu l’àutri culturi;
  2. Promòviri li diversitati linguìstichi e culturali di l’Europa, ca hannu a èssiri preservati e favuruti;
  3. Incuraggiri li cristiani di lu Vecchiu Continenti a insignàrisi li lingui e di cuntinuari a fàrilu duranti tutta la vita, macari finuta la scola.

Nta lu munnu esìstinu ntra 6 e 7 mila lingui. Di chisti, 225 sunnu originari di l’Europa. Lu multilinguìsimu europeu oi cumprenni puru a li lingui di li immigrati ca sunnu pi daveru assai; sulu a Londra si pàrranu 300 lingui!

La diversitati linguìstica italiana è una di li chiù granni in Europa. In Italia si pàrranu 33 lingui indigeni (pi non parrari di li lingui di li immigrati) si puru, di chisti, picca sunnu tutelati di li istituzioni.

Lu Cunsigghiu d’Europa e l’Unioni Europea s’aspèttanu ca, nni sta Jurnata, li autoritati polìtichi di li Stati membri e àutri enti pùbblici e privati discùrranu, p’esempiu, di pulìtica linguistica, di l’importanza di cuntinuari a insignàrisi lingui duranti tutta la vita e a qualisisia etati, di l’importanza di la promozioni di li diversitati linguìstichi e di tanti àutri argumenti chi hannu a chi fari cu lu multilinguìsimu e lu plurilinguìsimu.

In Italia spissu sta Jurnata passa, però, senza chi li cristiani si nn’addùnanu pirchì sunnu picca e, supratuttu, non vennu adequatamenti pubblicizzati, l’eventi ca si organìzzanu.

Lascia una risposta

L'indirizzo email non verrà pubblicato. I campi obbligatori sono contrassegnati *

È possibile utilizzare questi tag ed attributi XHTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>